Nachere lange Durststrecki ohni Wettkämpf isch di lang ersehnti Nachricht cho: De Jugendspieltag AZO/GLZ derf endlich wieder stattfinde! Bi strahlender Sunne und heisse Temperature het de Turnverein Hausen a. A. am Sunntig, 5. September 2021, de Ahlass duregfüehrt, das aber ohni Publikum wege de Pandemie. Über 400 Chind usem ganze Kanton hend am Gländelauf, de Pendelstaffette, de Mannschaftsspiil und am Renne um «De schnällscht Säuliämtler» teilgnoh. Dadevoo sind 21 Buebe us eusere Jugi Birmensdorf debii gsi.
Mit verschlafene Gsichter hend mir eus am 06:45 am Bahnhof Birmensdorf troffe und eus mitem Zug uf de Weg zum Wettkampfgländ gmacht. Nachdem mir eus amene Plätzli ihgrichtet und euses Lager ufgschlage hend, isches scho los gange. Es churzes Ufwärme und scho sind die müede Auge verschwunde gsi! Ab jetzt zellt nurno: «Seckle!». D’Läuf um «De schnällscht Säuliämtler» sind spannend gsi, und zude Freud vo eus Coaches sind eusi Jugibuebe de andere wortwörtlich «en Schritt voruus» gsie! Vieli Buebe hend sich chöne für’d Finalläuf am Namitag qualifiziere.
Nach de Läuf isches direkt wiitergange mit de Mannschaftsspiel. Zwei Teams hend im Jägerball und eis Team im Linieball um Pünkt kämpft. Mit neue Strategie und Teamgeist isches de Jungs glunge, die einte oder andere Gegner z’schlah.
Nachere churze Mittagspause hend sich d Buebe im Gländelauf es wiiters mal um ihri Gschwindigkeit gmesse. Am Namitag het s Team vom Linieball nomal derfe gege es anders Team kämpfe und isch dadebii vo de restliche Jugi Birmensdorf ahgfüüret worde.
Gschtärcht mit eim (oder mehrerne) Soft Ice isches am 14:00 id Finalrundi vom «Schnällschte Säuliämtler» gange. Und tatsächlich: drüü Buebe hend mit grossem Vorsprung chönne Podestplätz ergattere! Im Jahrgang 2010 hends d’Brüedere David G. und Robin G. uf de 1. und de 4. Platz gschafft. Als 2013er het sich de Piero L.P. uf de 2. Platz gstürtzt und de jüngsti Maxim G. het sich ih sim Jahrgang 2014 de 1. Platz ghollt. Uf die Leistige sind d’Buebe und mir Coaches meh als stolz und gratuliered de Jungs zu ihrne Medallieplätz!
Mit zfriednigem und erschöpftem Gmüet hend mir eus nach dem erfolgriiche Tag wieder uf de Heiweg richtig Birmensdorf gmacht. Dihei ahcho hend die stolze Eltere ihrne Chind gratuliert und nach de spannende Erlebnis vom hüttige Wettkampfstag gfröget.
Danke ah alli Buebe und Coaches wo debii gsie sind und Vollgas geh hend!
Für d’Jugi Birmensdorf
Livia Duddek
Da gahts zude Fotis