Nach die Wiehnachtsefrie hämmer wider vill motivierte Meitli ih de Halle dörfe begrüesse.
Und scho fliisig simmer am üebe gsii für de erste Wettkampf im Jahr. Nach de interne Uusscheidig händ denn im März die 15 beste Meitli dörfe am Hallewinterwettkampffinale in Bonstette starte. Nach eme glungne Wettkampf isch es Schlag uf Schlag wiiter gange, staht doch scho de Jugendsporttag vor de Tür. D Chind üebed sich im National- und Grätturne, ih de Liechtathletik oder aber für d Fitnessdiszipline. Vill Ziit bliibt nöd zum die unterschidliche Diszipline z üebe und überall eh Üebig parat z ha. Aber es händ alli ihres Beste geh und sind denn im Mai parat gsii für de Wettkampf. Ih dem Jahr simmer in Winterthur gstartet und händ en tolle Tag gha und au die eint oder ander Uuszeichnig dörfe mithei näh.
Bis zu de Summerferie isch denn chli Ziit blibe zum Spilli mache oder emal ganz anderi Sache z trainiere und uszprobiere, wo susch mit de Wettkämpf amel eh chli z churz chömed.
Und chum sind d Summerferie verbii gsi, simmer im August amene schöne Samstig in Tierpark Goldau, dete händ alli dörfe es Rätsel löse. Nach dem gmüetliche Zämesii isches denn im September scho wider miteme Wettkampf wiitergange. De Schnällscht Säuliämtler hät in Affoltere am Albis stattgfunde. Traditionsgmäss händ mer s schnällschte Meitli und de schnällscht Bueb gfunde und au bi de Spiili Gas geh. Ah dere Stell es riise Dankeschön ah alli wo ah dem Wuchenänd im Ihsatz gstande sind. Da am gliiche Wuchenänd nämli au no d Grätmeisterschafte, mit Birmensdorf als Organisator, stattgfunde händ, isches gar nöd so eifach gsii gnueg Wertigsrichter und Leiterinne z finde.
Chum isch de Ahlass aber dure gsii, isches au scho wiiter gange mit em üebe fürs Chränzli. Das hät zimli vill Ziit und zwüscheddure au Nerve bruucht. Aber am Ändi dänki hämmer eusi Skischuel im Griff gha. Mit 72 Meitli hämmer drü glungni Vorfüerige dörfe erläbe, es isch wider mal eh sehr lässigi Ziit gsi. Als Jahresabschluss hämmer no eh Chlausolympiade gmacht, wo alli Chind ih zweier Teams sechs Uufgabe beziehigswiis Pöschte händ müsse absolviere. Für die drü Beschte häts en chliine Priis geh und für alli natürlich en Grittibänz. Jetzt froiemer eus uf es nöchschts spannends Meitliriigejahr, mit ganz vill motivierte Chind. Und gliichziitig möcht ich mich bi allne Wertigsrichter bedanke, wo regelmässig für eus im Ihsatz sind, ohni eu chöntemer nöd ah de Wettkämpf teilnäh. Natürlich au es riise Dankeschön ah all Leiterinnen wo immer ih de Halle sind, denn au ohni eu wärs nöd möglich die rund 80 Chind z trainiere. Danke vill mal!
Eui Hauptleiterin
Melanie Bochud