Liäbi Turnerfamily
Scho isches wieder verbi… sKTF 2023 isch Gschicht und mit dem au äs Wucheend voller Froid, Bewegig, luschtige Idee und Zämäsii.
Agfange hed das Ganze am Samschtigmorgä am Sächsi mit äs paar verschlafne Gsichter, Begrüässigä undme Huufe voller Gepäck. Mit Vorfroid simmer in Zug igstigä, diä eine hend sich schomal mental uf dä Wettkampf vorbereitet, andäri hend agfange Frisure machä, fängs mal öppis gässä odär sind nomal wegpennt. Wiä au immer, dZugfahrt isch gschnell verbi gange und sött au schomal däfür stah wiä sganze Wucheend wird verlaufe: rasch, riibigslos, gmüätlich und voller Schmunzle. Mit oisne Fahne, dä Hornträger und dä Bluememeitli simmer denn is Fäschtgländ imarschiert. Im Gegesatz zu däm blaue Umzug wo sicher Idruck gmacht hed, isch oisäs Musigintro vom Musigwägeli zerschtmal nöd soguät acho. Halbsowild, denn hemmer oisäs Konzert halt umso meh hinne ufem Zeltplatz gnossä.
Nachdem sich dä Zeltplatz meh und meh gfüllt hed und dä Wagä nümme so ällei det gstande isch, ischs denn auscho Schlag uf Schlag losgange. Diä erschte hend sich umzogä, igwärmt und sind ab uf dä Wettkampfplatz. Dä Morge isch denn prägt gsi vo guätä Leischtige und zfridnä Turner. Alles i allem chömmär sicher stolz si uf dGsamtleischtig wommer da annebracht hend, was denn au nomal dRed vodä Oberturner bestätigt hät. Mitme Applaus sind all oisi Resultat abgsegnet worde und dä berüähmt berüchtigti vierti Wettkampfsteil hed sich langsam afange akündigä. Natürlich hed i däm Ganze no müäsä Platz finde, dasmer traditionellerwiis oises Vereinsföteli erneuered. So hemmer meh odär weniger verschwitz und scho vom Wettkampf abäkämpft, id Kamera glächled und däbi müäsä luege, dass dä Ahänger wommer ois druf platziert hend nöd kippt. So isch schlussendlich sogar soöppis wiä äs Gruppeföteli zmachä zunärä luschtigä Aglegeheit wordä.
Dä Rescht vom Namittag isch denn mit astosse, Vorfüährigä luege, sFäschtglend uskundschafte, im Massagezelt go entspanne und nomal noii für dä Abig sammle, verbiigange. Schlussendlich hemmer ois denn für än gmeinsame Znacht im Feschtzelt troffä, sind gmüätlich zemeghockt und hend plaudered. Währendem diä eine dänn no ä Turnshow go luege sind, sind andäri is Wiistübli ghockt und hend dä Sunneuntergang gnossä. Wo diä rot lüchtendi Sunne langsam ganz verschwunde gsi isch undmer dä Bass vodä Musig immer lüüter agfange hed ghöre, heds au ois is Feschtzelt zogä wommer mit all de andärä Verein ä lässigi Nacht mit vill tanze, lache und fiire hend chönnä verbringä. Villi luschtigi Momänt sind entstande über diä mir sicher no lang werdet redä und ois als Verein nöcher zemebringed.
Nach dä lange füächt fröhliche Nacht und äs paar wenige Stunde Schlaf, hemmer ufem Zeltplatz ussä zeme Zmörgeled, ois über dErläbnis vom geschtrige Abig ustuscht und zuegluegt wiä nah und nah äs paar zerknittereti Lüüt zudä Zelt uschrüüched. Denn sind au schowieder diä letschte Ereignis ufem Plan gstandä: Zeltplatz ruume, bim Fahnelauf afüüre und nomal alläs gäh bevor sFäschtgländ sich langsam leert. sMusigwägeli isch nomal im Isatz gstandä und mir hend no oisi reschtlichti Energie däfür bruucht uf dä Feschtbänk zstah und zeme ummeztanze. Erschöpft abär glücklich hemmer ois denn als Hordä vom Feschtgländ verabschidäd und sind in Richtig Hei losgwandered. Ufem Heiwäg heds denn natürlich nomal ä Gsangsilag gäh bevormer denn vomene professionellere Konzert zBirmi am Bahnhof in Empfang gnoh wordä sind. Sisch äs schöns Gfühl nachme erfolgriiche Wucheend dihei so Willkomme gheisse zwerde und mit allne zämä dur oisäs Dorf dur zlaufä zum dä Vereinsmomänt no äs letschts mal zgnüüsä. Au sZnachtässä isch denn nomal äs gmüätlichs zemesii gsi mit villne liäbä und stolze Wort und luschtige Erinnerigä.
Scho isches wieder verbi… sKTF 2023 isch Gschicht abär in Gedankä werdemer sicherlich no lang dete si. Wiäs idä OberturnerRed so schön gheisse hed: „Ällei ischmer starch, zeme ischmer stärcher.“ Als Verein erschaffemer Momänt wommer suscht niä so chöntet erläbä.
Dankä oii allne für das lässigä Wucheend und dankä Babsi für din Isatz diä letschte foif Jahr!
Céline