Am 22. April 2023 hät sich d Grätriige Birmensdorf uf de Wäg ist Trainingslager z Bonstette gmacht. Am 07:45 sind all Chind top motiviert ide Halle gstande. Nach de Begrüessig vo de Simone händ mer all zäme d Grät ufgstellt. Nach churze Schwirigkeite mit em Ufblase vom AirTrack isch alles turnparat gstande. D Sara hät es cools Iturne gmacht und dänn ischs ändlich so richtig losgange. Am Chäsi sini Gruppe hät de Flick-Flack genaustens unter d Lupe gnoo, de Mäse und Sara händ mit ihrne Chind de Mühlufschwung güebt, d Gruppe vom Gugi und de Janine hät ade Ring vollgas gäh, d Ricci hät am Sprung am höche Flug gschaffed, und d Simone hät mit em KE ade Ohredeckig güebt.
De Z`Mittag hät natürli de STEINER bracht. Es hät Lasagne gäh. Mit volle Büch sind di einte id Halle go Spiili spile und di Andere händ dusse di schön Sunne gnosse. Am zwei ischs dänn mit em Training wiiter gange. Gäge di halbi foifi ischs immer lisliger worde, das isch es sehr guets Zeiche! Das heisst nämli, dass es astrengend gsii isch und di Meischte müed worde sind. Bim Schlussspiili händ jedoch einigi plötzlich en Energieschub bechoo.
Nach dem erfolgriiche Tag händ sich all am foifi verabschided und sind mit Vorfreud uf de nächsti Tag is Bett gange.
Au hüt hät de Tag wider mitemene Iturne gstartet. Dismal isches vom Gugi gleitet worde. Es sind vill Chraftelemänt debi gsii. Sehr fescht verschwitzt ischs dänn as erste Grät gange.
Am 10:15 isch d Znünipause gsii. D Öpfel vo de Lehrbreiti sind natürli uf em Rang eis gsii. De Rest hät d Simone bsorged. Danke vill Mal!
Dänn händ sich all uf de feini Z‘Mittag gfreut, wills hät Pizza gäh!
D Charlotte hät am meiste vo allne gässe, isch trotzdem topfit ide Pause mit de anderne go sekle. D Soé und d Mailin händ händ de drüüfachi Flick-Flack güebt und au gschafft. Gratulation! Hüt isch s Wetter nid so schön gsii, drum händ di fuule uf de Matte päuselet.
Wiiter gange isch es mit emene Spiili vo de Dana und aschlüssendem Idehne. Danach sind mer wider a eusi Grät gange.
Churz bevor s K4 hät welle afange hät de Chäsi ihne all Matte weggnoo vom Bode und bi sich en XXL Turm ufgstellt. Hää?! Achso, ja d Kerstin, d Soé, de Kai, d Jana und Leonie händ dänn ebe de Salto perfektioniert ab de Ring. Au wänns nani bi allne super klapped hät isch de Chäsi mega stolz gsii. Beendet isch de Tag vom Päde worde mit emene „Alle gegen Alle“. Usdehnt hät d Kerstin. Zum Schluss händ na all dörfe es Stück Pizza vom Z`Mittag Hei näh.
En wiitere, sehr lehrriiche,Tag isch z End gange.
Zum dritte und leider letschte Mal hämmer de Tag mitemene Iturne vom Chäsi gstartet. Wäge de mega lange Stafette sind mer mit 15 Minute Verzögerig ad Grät gange.
De Mattechrieg isch wider usbroche und me hät si sich mit Müeh müsse ergattere.
Au wänn nümm all so fit gsi sind, sind au hüt di scho fasch kaputte Händ nid gschohnt worde.
Zum Z‘Mittag häts vom STEINER feini Älpler Magrone gäh. Danke vill Mal!
Zum letschte Mal händ mer eus nach em Mittag ufgwärmt mitemene Blitzfangis vom Päde. Das hät namal so richtig gfägt.
Am vieri hämmer leider dänn müsse ufruume. Es isch ruckzuck gange und ohni grossi Komplikatione. De grössti Spass händ di chliine am AirTrack kah, wills händ dörfe drüber rolle. Ide leere Halle häts dänn na es Usdehne vo de Isa gäh. Truurig simmer us de Halle uf de Zug gange, damit mer in Birmi chönd de Abschluss fiire, und händ fasch d Jana vergässe. Zum Glück isch si dänn na uftaucht!
Di letschti Sunne händ mer uf em Wäg zu de Lehrbreiti gnosse, will nachher ischs cho rägne. Aacho sind mer erschöpft und es hät mega feini Hot-Dogs gäh mit Härdöpfelsalat.
Ide churze Pause vor em Dessert sind di einte zu de Rösser vo de Anita go luege und di andere händ dinne chli greded. Zum Dessert häts di beste Glace gäh.
So langsam händ sich dänn immer meh Chind verabschided. Somit isch s Lager au z Änd gange.
Mir sind all froh so tolli und unfallfreii drüü Täg chönne z gha haa. Das wär alles ned möglich gsii ohni d Organisation vo de Simone. Au de restliche Leiter händ mer sehr vill z verdanke. Das schätzed mir Chind sehr! Drum vo eus es riise M-E-R-C-I.
Für s GeTu Birmensdorf
Dana Kammerlander