S Jahr 2014 het leider für de TV nöd e so gut agfange. Eusi 2 Oberturner händ en Unfall gah und sind somit für längeri Ziet usgfalle. Die Absenz het mer i de Halle natürli gspürrt drumm dank ich a dere Stell allne wo i dere Ziet glueget händ das de Turnbetrieb im gwohnte Rahme wietergloffe isch.
Am Ernst sin Unfall het ihn aber nöd dra ghinderet am Letschte Januar Wucheend mit eus as Skiweekend uf Arosa mitzcho. De Dani Job het einisch meh alles rundum organisiert gha und jede weis efengs was er ztue het. De Wind het eus leider vo de Skipiste scho gli emal an Scherme triebe. Ich glaub mi cha scho sege weg dem schlechte Wetter, so wenig sind mir glaub nonie uf de Ski gstande amene Skiweekend. Arosa isch im gross und ganze eigentlich de ideal Ort zum Skiweekend vom TV durezfüehre, wenn doch nöd die viele Kurve wäred. Die händ nöd all uf em Hei weg eso gern gha. Mit em Abstecher am Sunntig Abig im MC Donalds und de mithilfe vom Dani Gasser het das Weekend no es zusätzlichs Highlight meh übercho.
S Trainingsweekend Endi April isch wiedermal in Filzbach duregführt worde. De Remo und Denise händ alles super planet und jede het sich i sinere Disziplin chöne ustobe. Da de Daniel Derrer am Sunntig no Geburtstag gah het, sind mir bi ihm zAbig no iglade worde.
Euse Oberturner het denn am 1.Mai sinn neu erboute Betrieb de Öffentlichkeit zum aluege anerbotte. Mir händ ihn da debi i de Festwirtschaft nach eusne möglichkeite versuecht zunterstütze. De ganz Tag isch guets Wetter gsi und viel Lüt hend sich die Besichtigung nöd la entgah. Die gut Stimmig het sich denn au uf eus übertreit und so sind mir no lang bis früeh am morge ghocket.
Denn ischs losgange mit eusne Vorbereitigs Wettkämpf. Bsunders a de Regionalmeisterschaft in Thalwil händ mir euses Organisationstalent müesse bewiese. Am Morge händ mir Reck, Fachtest und Gymnastik vorgführt und am Nammitag sind mir vor de Chile in Birmensdorf gstande zum a de Marion und am Thomas recht herzlich gratuliere zum Hochziet. Während mir es schöns Hochziet händ dörfe gnüsse händ eusi Gymnastik Fraue Churzerhand Nummere am Nammitag ohni eus dure gführt. Mir sind denn schono froh gsi das Fraue ohni eus nöd die Besser Note gholt hend. Das heisst es brucht eus doch no.
Ei Wuche druf het denn Simone und de Philipp Boss in Knonau kirchlich ghürte. De Turnverein het det au dörfe go spalier stah und de Presidentin vom DTV alles gueti wünsche.
Am 20. Juni sind den eusi aktive Einzelgrättturner mit es par Supporter as Seeländische Turnfest in Orpund greist. Sit langem sind au bi de Jugend wieder mal es par aktivie für eus gstartet. Das isch schön wenn mer gseht das Jugendförderig iri Frücht treit. De Ramon Brand het sich den au zum heimliche Shooting Star gmauseret und het sich de 3. Rang im K5 gsicheret. Bravo!!!!!
Am Samstig Morge isch denn au de restlich Teil vom Verein in Orpund itroffe. Will Abfahrt in Birmensdorf für die einte leider no chli zfrüh gsi isch händ mir churzerhand s Reckprogramm no liecht umgstellt. Die andere Diszipline händ planmässig chöne duregführt werde und mit ere Note vo 27.33 händ mir s Podest nur knapp verpasst. Einisch meh händ mir denn am Sunntig Nammitag Bar nomal gstürmt und sind no gli mal agfrägt worde ob mir nächst Jahr wieder am Seeländische debi seged. Mittlerwille wüsse mir: Büre mir chömed…..
Eis Wucheend druf sind mir wieder mit em Car as nächste Turnfest greist. S Appezeller Kantonale in Appenzell isch euse Zielort gsi. D Wettkampf Alage sind sehr gut gsi und au Resultat händ sich chöne gseh lah. Will da aber S Teilnehmerfeld echli stärcher gsi isch sind mir nöd bi de vorderste debi gsi. Bsunders erwähnenswert isch eusi Fachtest Gruppe wo mit eme 9.38 abgschlosse het und das a irem erst 3. Turnfest Isatz. Wenn ihr eu so steigered sind ihr scho gli uf em 10i. Am Sunntig het de Petrus aber nüme mitgspillt und Festgländ i nen riesige See verwandlet. Ich glaub aber d Organisatore händ scho so viel Gwünn gmacht gha das ihne das glich gsi isch. Denn hete mir nöd euses Legendäre Musigwägeli debi gha, wär am Sunntig uf em ganze Festgländ toten stille gsi. Bevor mir am frühe Nammitag uf de Car sind hets im Dorf no en Usklang geh wo die eint oder ander Rundi vo fröhliche Turner zahlt worde isch.
Am 23.August händ sich Fabienne und de Remo s Ja-wort geh. Will mir grad am Üebe gsi sind für eusi Cowboy nummere für am Dragonertag het eus de Remo a sim Hochziet e bsunderi Ilag bote. Isch er doch spontan als Indianerin für eus igsprunge.
Nach rund 4 Jahr bi eus als aktive Turner het de Florian Binggeli wieder i sini alt Heimat gfunde. Mir händ uf de Turnfahrt am Betttag ihn dörfe go bsueche und er het eus 2 abwechsligsrichi Täg im Welsche bote. Mir wüssed jetzt was de Unterschied vo Wie am Neueburgersee, Genfersee oder Absinth isch. Au wenn die einti bim Absinth scho chli Müedigkeit erschinge gha hend. Userdem het er eus a dem Wucheend au zeigt wieso das Landjugend im Welsche viel meh Mitglieder händ als bi eus.
Endi November het de Turnverein aktiv Turnshow mitgstaltet. Mit de Helene Fischer und de Troja Nummere händ mirs Publikum chöne überzüge. Ich glaube es isch nonie so heiss uf de Bühne im Brüellmatt gsi.
De Marius und de Beni händ eus den am Chlaus mit eme richtige Esel überrascht und en neue Rekord ufgstellt. Wenn all soviel Tischgrill würded Esse wie mir wäri de Steiner immer usverchauft.
De vorletscht Abschluss vom Jahr het i de Sunne stattgfunde. Schlussturne isch uf de glich Tag wie Ussufete gfalle und mir händ det eus müesse zeige, händ mir doch i de vergangene Jahr und TV Gschicht scho vieles erlebt i dere Beiz. Ich denke da inne weis jede sini eignig Gschicht wo ihn mit em Restaurant Sunne verbindet. Leider het de Marius Chette a de Sagi vergässe und somit isch de Stammtisch ganz bliebe.
E chlini Gruppe vo 6 Lüüt het denn s Jahr mit em Bodelege im Hallestadion dörfe beende. Für eusi Davis Cup gwünner de Federer und de Wawrinka händ mir chöne de Tennisbode montiere. Zusätzlich zum guete Lohn hets no e Usrüstig geh und de Match Live zum luege.
Davis Cup Gwünner sind mir im Turnverein nöd grad. Aber ich denke jede het für sich sini Erlebnis wo er mit dem Verein verbindet. Drum freu ich mich scho jetzt au im 15 viel gmütlichs, sportlichs und neus mit eu z erlebe. Eue President verussichtlich au i dem Jahr.